syi'ir-syi'ir jawi

MELU MBANGUN KANTI NIYAT NGIBADAH

d e n i n g

A. ASYHARI HUSAIN saking P A T I (Jawa Tengah)

Kanthi bismillah niyat ngibadah

nulis syi'iran kanggo andadah

bayining bangsa kang lagi munthah

nyuwun ngapunten sing kathah kathah

Shalawat salam mugi dugiya

Nabi Muhammad penutup Nabi

ingkang nyontoni kita sadaya

tiyang sing purna laki lan rabi

Tiyang sing purna nglampahi leres

gesang merdika mboten katindhes

mikirke turun sae tan cures

himmahe luhur tan ngantos ludhes

Iman Islame Ngamal Jihade

kukuh tur kuwat ing semangate

pejah kaliren tan purun nyade

agama Islam sak syari'ate

Mangga syi'iran kanthi dilaras

mpun sanget sanget mikiri beras

kita mpun syukur sami dha waras

pendhudhuk aman tanpa dikeras.

MELU

d e n i n g

A. ASYHARI HUSAIN saking P A T I (Jawa Tengah)

Artine melu meh kaya manut

yen cara Arab disebut itbak

melu tut mburi bisa kepentut

ndhangak mlakune kesandung bun

Najan mung melu kudu tenanan

mung katut melu pas kaya unthu

angin mangetan katut mangetan

ambyar brantakan watu dibenthuk

Dudu pegawe mlebu ing Kantor

lu-melu ngetik lir jurutulis

marga mlebune mung katut montor

dikira sinthing rambute klimis

Santrine ndithing mlebu ing greja

amarga katut prawan sing ayu

ambengok adzan ing ndhuwur meja

prawan kisinan mbrebet lumayan

Melu sing bener manut mring ALLAH

manut dhawuhe Nabi pungkasan

marang sing mungkar kondha dhak doyan

Manut miturut mring undhang-undhang

kwajiban rakyat buruh pedagang

sapa sing mlanggar mring undhang-undhang

aja kok turut nduweya gudhang

KEWAN

d e n i n g

A. ASYHARI HUSAIN saking P A T I (Jawa Tengah)

Disebut kandhang panggonan kewan

dhak ngerti subuh apa wis awan

dhak macam nyonyah bersama tuwan

malu berkumpul ditempat rawan

Dadi wong manut dhak angger manut

cukup diwenehi ngombe lan pangan

watone manggung kaya perkutut

ngantiya mati ing jro kurungan

Ana apike sing jeneng kucing

lamun sing wareg turune mlengking

wetenge ngelih nglakoni maling

gereh yo kersa pa maneh daging

Manungsa iku jare ya kewan

rakuse banget angel ditahan

bisa tha-intha bengi lan awan

yen duwe karep sajak lelahan

Apa bedane kewan lan uwong

ing pembangunan jiwa lan ragane

sing cetha kewan bangun ndak uplong

manungsa bisa nganggo pulpene

Jaman jajahan jaman merdika

kewan ndhak mbangun wareg mangane

wong tani mbangun kewan culika

sing diadhepi dadi mangsane.