puji-pujian jawa

MBANGUN

d e n i n g

A. ASYHARI HUSAIN saking P A T I (Jawa Tengah)

mBangun sing katon sing kasat mripat

kerja yang gampang dan bisa cepat

wih luwih waton ana dhuwite

royokan mborong untung nggo nyate

Luwih nggo nyate nggo tuku tanah

Yen isih luwih nggo galang omah

borongan ala dhak dadi apa

waton wis kepyur mring sapa-sapa

Digarap kari mbanguno mental

mergo untunge dhak bisa nguntal

rakyat wis kadung ndhisiki nakal

sing kondha mbangun kakehan pokal

Omong bab mbangun ora mung mbangun

ora mung blereng rupa lan wangun

dhasare ayu dironyok inten

yen sakit bengang sing purun sinten

mBangun saiki mang taun maneh

katinggal jaman njur katon nyleneh

sebab mbangune mung krana oleh

imane rusak kanca dibeleh

Ambangun jiwa akhlake bangsa

pancene angel luwih rekasa

akeh ongkose ora karasa

tergantung tindak tanduk lan karsa

AKHLAK

d e n i n g

A. ASYHARI HUSAIN saking P A T I (Jawa Tengah)

Mula yen mbangun jiwane bangsa

dikarekake ora ing ngarsa

jiwane ringkih katone rosa

akhlake bangsa kaya dipusa

Akhlak yen pusa saka nagara

negara rusak keh gara-gara

wiwit dharatan tekan segara

kabeh ngrasakna kaya wong lara

Bangunan apik taqwa dhasare

ikhlas ngibadah ora mung sare

ora mung kandel wedhak pupure

Dhak ngreti ngasar ing wanci sore

Wah salah maneh yen mbangun niku

datan warata mung kaya paku

amung golongan sing wonten mriku

daging kulite ora diaku

Aja dibeda dipontho pontho

dibedakake desa lan khuta

coba tamatna nggo suryokhonto

yen pengin dadi bangsa waskitha

Dijiwit lara aja anjiwit

bangsamu iku sih daging kulit

aja kumaki peh sugih dhuwit

digawe becik kok anggep slilit

PINTER

d e n i n g

A. ASYHARI HUSAIN saking P A T I (Jawa Tengah)

Landa penjajah taktike pinter

rakyat diglembuk pinter dhak perlu

waton mbut gawe sarana seser

bodho dhak apa pangan dilulu

Yen rakyat pinter ngreti politik

angel di adu dhak kaya pitik

dhak suwe njajah dhak bisa ngglenik

rakyat dha brontak nuntut hak milik

Ayo pemudha ayo pemudhi

Ja gelem bodho sregep sinau

hukum agama hukum negari

tuntuten terus sakehe ngelmu

Pemudha kutha pemudha Desa

Dhak perlu beda sing wis diwasa

eling HANURA kudu kuwasa

anak putumu ora rekasa

Ayo berjoang supaya menang

menangna tenan sing orde baru

nutup HANURA orde sing nyakang

nutup sing bener salah diluru

Do'a dan kerja semua bangsa

Indonesia rakyatnya cerdas

mulai kota sampai Desa

Hancurkan segra para penindas

BENER

d e n i n g

A. ASYHARI HUSAIN saking P A T I (Jawa Tengah)

Sing maha bener mung Gusti ALLAH

yen dudu Nabi isih sok salah

Yen ana rembug sajak menyalah

anggepen wae wong ora nggenah

Yen ana oknum saka ngendiya

wong saka Parpol utawa Golkar

dhak mesthi bener pata matiya

yen undhang-undhang dicakar-cakar

nDang-undhang bener dislewengake

perlu pus apus di tindakake

Parpol lan Golkar dudu Pamrintah

Dhak perlu kaget dhak perlu latah

Yen golek swara kudhung Pamrintah

wis ora usum medeni bocah

sing nyedhot getih jarene lintah

seneng pus apus mung wong sing rucah

Kendel sing bener kanggo mbelani

apa sing bener dhak wedhi geni

Dhak gelem mundur kapara wani

nggayuh idhaman sing didhemeni

Mungsuhe kendel iku wong kafir

sing nutup bener sarana tabir

ora ngelinge yen mung musafir

dhak mati syahid mati njebibir

NYAMBUTGAWE

d e n i n g

A. ASYHARI HUSAIN saking P A T I (Jawa Tengah)

Wong duwe ngelmu sing tanpa ngamal

kaya wong nglamun mbulan diuntal

ngel mune puret njendhel kal mengkal

kaya wong turu tutupan bantal

Ngamal tegese tumandang gawe

pikiran kanggo tangan kumlawe

ora mung golek tambane luwe

ngelingi urip yen isih suwe

urip ing donya tekan akhirat

bakale mulya apa temporat

ditemtokake wit saka jagad

wani berkorban ngentokke wragad

wong nyambut gawe rak mung pegawe

buruh pedagang tani lan tukang

kasil orane wong nyambut gawe

ALLAH tentukan dihari blakang

Mung dodol kacang sing sugih ana

pagawe tinggi temporat akeh

mula mbut gawe sing wicaksana

sing krana ALLAH dhak krana oleh

Jujur mbut gawe ngamal sing soleh

dhasare taqwa mring Gusti ALLAH

ja dupeh enak babi kok beleh

wediya nraka nglakoni salah.

AMAN + TENTREM

d e n i n g

A. ASYHARI HUSAIN saking P A T I (Jawa Tengah)

mBangun pa wae lagi sampurna

yen aman tentrem kartoraharjo

tentrem jiwane tekane raga

rakyat ngrasakna yen padha beja

ragane tentrem jiwane kisruh

katone ayem nyatane misuh

lir manuk kacer agawe susuh

tansah jlalatan kuwatir musuh

kwajiban Abri lan masyarakat

njaga ngamanke ing masyarakat

ja nganti ana sing padha nekat

pengin dipindah bedil diangkat

ramene cangkem dhak mbebayani

ramene bedhil bisa mateni

gaman sing ampuh gamane ati

tindak lakune angati ati

Ja tiru tiru cara PKI

pengin kuwasa angkat gegaman

moh nindakake ing demokrasi

moral dibuang sing penting mangan

Komunis Vietnam bar menang perang

aja kok kira mandheg semono

Indonesia mungkin diserang

Anggunakake teori domino.

PEMILU

d e n i n g

A. ASYHARI HUSAIN saking P A T I (Jawa Tengah)

Pemilu iku lakon sing lumrah

ana negara sing demokratis

Lakoni wae sarana bungah

dhak prelu wedi karo pulisi

Sapa sing bisa melu Pemilu

ndhang undhang jelas ngatur carane

rakyat pegawe padha kon melu

bebas memilih manut kersane

tukanga becak buruha pabrik

mlarat pa sugih sarekat desa

dhuwite akeh apa mung sithik

duwe hak padha dhak kena meksa

Miliha Golkar miliha Parpol

Mentriya pisan dhak kena nglarang

sajak mung milih gambar sing jempol

nyatane milih wakil sing terang

Ora mung wayang najan pemilu

Janaka tindak Cakil medeni

copot pangkate dhak gelem melu

tiru Janaka kapara wani

Siapa tahu derita rakyat

patut dipilih jadi wakilnya

bersatu rakyat negara kuat

rakyat penakut rugi negrinya.

HIMMAH

d e n i n g

A. ASYHARI HUSAIN saking P A T I (Jawa Tengah)

Wiwit lahire manungsa iku

ngrasa merdika emoh dibudak

madeg pribadi emoh dipangku

nduweni himmah emoh dipidak

Sinebut himmah ya cita-cita

himmah 'aliyah ta – cita luhur

pribadi agung luhur dicita

pribadi kunthet himmahe ngawur

Pikiran jothok senenge ngathok

pikiran luhur seneng nenandur

ben anak putu ora dha bosok

tanduran thukul budi sing luhur

Himmah 'aliyah prentule iman

himmah sing kerdhil kudhungan kendhil

mring cangkem karut nguja gegaman

jirihe nyempok thik sithik jondhil

Wali ndhasari himmah 'aliyah

lir nyebar pari ing saben tanah

Indonesia gung Islamiyah

ambalung sumsum mlebet ing manah

Himmah sing kerdhil pas kaya Cakil

gadhe agama ing pabrik Trangkil

Islam sing luhur di idak sikil

rumangsa enak ngrokoti kikil.

NIYAT & IKHLAS

d e n i n g

A. ASYHARI HUSAIN saking P A T I (Jawa Tengah)

mBut gawe kuwi nyawane ikhlas

Raga mbut gawe nyawa dhak ana

nggejojor kothong lir kaya gelas

labet gawene jebul dhak ana

Conto wis akeh sing kedadeyan

gilir gumanti digulung jaman

organisasi apa golongan

dha mati ndadak kena aradan

Sing ngedekake isih dha urip

organisasi ndhisiki mati

ikhlas dhak ana sing ana tarip

kanggo pribadi ummat dhak ngreti

Mula sing prelu niyat sing ikhlas

mbela agama nusa lan bangsa

diganjel hukum dhak hukum alas

hukum Agama Nusa lan Bangsa

Sing ngamal ikhlas dawa umure

ngamal dhak ikhlas cendhek umure

dhak duwe labet tekan suk sore

uripe sugih matine kere

Niyate ikhlas niyat ngibadah

amrih ridlane kang Maha Murah

ben anak putu dha gemah ripah

urip merdika ora dijajah

NGIBADAH

d e n i n g

A. ASYHARI HUSAIN saking P A T I (Jawa Tengah)

Nglakoni shalat klebu ngibadah

jumlah ngibadah akeh warnane

nulungi tiyang kang mboten gadhah

klebet ngibadah kasaenane

Madoske nafkah anak bojone

mbangun ndandosi masjid langgare

yen nyata jujur tindak tanduke

klebet ngibadah lelabuhane

Nukanga becak dadi pegawe

dagang lan tani nggarap sawahe

jujur lan adil pegaweyane

klebu ngibadah kesaenane

Pengin dwe anak kumpul bojone

ngakehna sanak salame murah

ngganyang sing mungkar kiwa tengene

uga kalebu ngamal ngibadah

Weruh wong sasar nggadho praturan

ngapusi rakyat kurang ajaran

yen gelem ngganyang tepat sasaran

kalebu jihad oleh ganjaran

Mula ngibadah kudu sing kendel

ora mung weruh cukup mung mangkel

donya nyawane ikhlas diprunggel

luhur budine dhak kaya kintel.

DONGA

d e n i n g

A. ASYHARI HUSAIN saking P A T I (Jawa Tengah)

Dhuh Gusti ALLAH kang Maha Tunggal

Tanpa sekuthu barang kang enggal

Dalem nyenyadhong wageda enggal

Kados ngentosi medale tanggal

Mugiya bangsa kula sadaya

Jenengan entas sangking bebaya

Pengaruh donya kang tanpa daya

Nyingkur Jenengan kabudi daya

Dhuh Gusti ALLAH nyuwun ngapura

Dosa adalem kang sampun dora

Nyembah Jenengan kanthi dek sura

Temahan dalem manggih sangsara

Badan adalem katingal sehat

Nging manah dalem kados kasikat

Nak putu dalem badhe kesrakat

Menawi dalem tan wantun jihad

Karidlan Gusti kang dalem suwun

Negari kita kang nembe mbangun

Mugi Paduka angijabahi

Adil lan makmur kita panggihi.

Amien Amien ya Rabbal 'Alamien !!!

P a t i , 1 9 J u n i 1 9 7 6 .